Spurt og svarað

Nokkrar algengar spurningar sem okkur hafa borist:

Fljótlegast er að nota kaupkerfi HHÍ efst til hægri hér á síðunni. Einnig er hægt að hringja í síma 800-6611 eða 563-8300 á skrifstofutíma. Svo er líka hægt að heimsækja einn fjölmargra umboðsmanna okkar um allt land og kaupa miða hjá þeim.

Einfaldast er að láta leitarvélina í kaupferlinu efst til hægri hér á síðunni aðstoða sig við leit að númeri eða hafa samband við umboðsmann okkar og fá aðstoð.
Auk þess að vera númeraður, er hver miði auðkenndur með bókstaf; B, E, F, G og H. Hvert númer hefur einn trompmiða sem auðkenndur er með bókstafnum B. Trompmiðar hafa fimmfalt gildi. Hinir bókstafirnir eru einfaldir miðar. Ekki skiptir máli hver þessara bókstafa er valinn, þar sem allir miðar með sama númeri fá vinning ef númerið er dregið út í Aðalútdrætti. Þegar dregið er í Milljónaútdrætti er hins vegar einungis dregið úr seldum miðum og bæði dregið út númer og bókstafur.

Einn miði kostar kr. 1.000 á mánuði. Trompmiði kostar kr. 5.000, og gefur fimmfaldan vinning. Fyrir þetta verð er miðinn gildur í útdráttum mánaðarins svo framarlega sem búið sé að ganga frá greiðslu tímanlega fyrir útdrátt.

Trompmiðar eru auðkenndir með bókstafnum B, t.d. 32695-B.
Í Aðalútdráttum hefur trompmiði fimmfalt gildi á móti einföldum. Vinningur sem dreginn er út á trompmiða fimmfaldar vinningsupphæðina. Útdreginn vinningur sem er kr. 5.000 verður kr. 25.000 á trompmiða og 5.000.000 verða 25.000.000!
Í Milljónaútdrætti er dregið um 10 vinninga að fjárhæð kr. 1.000.000 hver. Í þeim útdrætti hækkar vinningsupphæðin ekki, heldur aukast möguleikar eiganda trompmiðans til vinnings með því að hver seldur trompmiði er fimmfaldur í pottinum sem dregið er úr.
Endurnýjun trompmiðans er, eins og vinningarnir, fimmföld á mánuði eða kr. 5.000.

Aðalútdráttur hvers mánaðar er í kringum 10. dag hvers mánaðar. Í þessum útdrætti er ævinlega mikill fjöldi vinningshafa eða í kringum 3.000 aðilar sem geta fengið í sinn hlut vinninga allt frá kr. 5.000 upp í kr. 45.000.000.

Milljónaútdrátturinn fer fram tveimur vikum eftir Aðalútdrátt. Oftast eru dregnir út 10 einnar milljónar krónu vinningar en stundum eru þeir þó fleiri, það fer eftir vinningaskrá. Einungis er dregið úr seldum miðum í þessum útdrætti. Þannig er tryggt að hver einasta milljón fer til heppins miðaeiganda.

Dregið er tvisvar í hverjum mánuði. Fyrri útdráttur fer fram um 10. dag hvers mánaðar. Seinni útdrátturinn, Milljónaútdráttur, fer svo fram tveimur vikum síðar.

Fimm miðar eru gefnir út með sama númeri. Miðarnir hafa þó ekki alveg sama númerið þar sem þeir eru aðgreindir með bókstöfunum B, E, F, G og H.
Númer með bókstafnum B er svokallaður trompmiði. Trompmiðar hafa fimmfalt gildi á við hina miðana. Það eru einfaldir miðar. Ekki skiptir máli hver þessara bókstafa er við miðanúmerið sem dregið er út þar sem hver og einn þessara miða fær vinning ef númerið er dregið út í Aðalútdrætti. Þegar dregið er í Milljónaútdrætti er einungis dregið úr seldum miðum og þá er dregið út bæði númer og bókstafur.

Það er sem sagt hægt að eiga einn miða með tilteknu númeri, tvo, þrjá og allt upp í fimm miða sem gefa nífaldan vinning!

Í reglugerð um HHÍ er sagt til um að vinningshlutfallið skuli vera 70%. Það þýðir að af 1.000 krónu endurnýjun hvers miða fara 700 aftur út til miðaeigenda sem vinningar.
Fjöldi vinninga er líka mikill. Þess vegna er hægt að segja að u.þ.b. annar hver miði fái vinning!
HHÍ á enga miða sjálft og greiðir því 70% tekna sinna til heppinna miðaeigenda árlega.

Vinningar HHÍ eru skattfrjálsir.
Þetta þýðir að ef þú færð 5.000.000 í vinning – þá færðu 5.000.000 í vinning! Happdrætti Háskólans sendir hvorki skattyfirvöldum né öðrum aðilum upplýsingar um vinninga.

Vinningshafinn fær að vita um vinninginn – enginn annar.
HHÍ leggur mikið upp úr trúnaði við viðskiptavini sína. Það er vinningshöfum því í sjálfsvald sett hvort þeir segja einhverjum af heppni sinni eða ekki.

Ýmsar leiðir eru til þess að sjá hvaða númer fengu vinning. Þær eru helst þessar:

Vinningaskráin birtist fljótlega eftir útdrátt á vefnum okkar.
Vinningaskráin er birt í Morgunblaðinu daginn eftir útdrátt.
Fjótlega eftir útdrátt er hægt að slá inn miðanúmerið og láta vefinn leita í vinningaskránni.
Með skráningu á ”Mínar síður” er hægt að fá sent sms og/eða tölvupóst þegar vinningaskráin er komin á netið, þegar vinningur kemur á miðann þinn eða með númerinu sem fékk hæsta vinning mánaðarins.
Þeim sem ekki hafa sótt vinninga tveimur vikum eftir útdrátt er send tilkynning í pósti.
Síðast en ekki síst er hægt að hringja í HHÍ og umboðsmenn þess um allt land og leita upplýsinga.

Einfaldasta og fljótlegasta leiðin til að fá greiddan vinning er að láta leggja vinninga sjálfkrafa inn á bankareikning miðaeiganda. Innleggsreikning er hægt að skrá með því að hringja í síma 800-6611 eða 563-8300 og gefa starfsfólki HHÍ upp reikningsnúmerið. Einnig er hægt að fara til umboðsmanna og fá greidda vinninga.
Útborgun vinninga hefst viku eftir útdrátt.